పేరంటమాకట్టు

విందు భోజనహ్వానం, మిత్రుడింట్లో పేరంటం
ముచ్చటైన అలంకారం, భార్యామణి ప్రయోగం
తామెచ్చిన నగలుబెట్టి, సోయగాల వగలపట్టి
ఛూమంతర జాలమా, భామా కలాపమా!

పూజానంతర సమూహం, ఆడువారి సంయోగం
మగవారికి తావులేదు వారి మధ్య ప్రవేశం
ఆమెనెలా పిలిచేది, బయటకెలా లాగేదీ
బామ్మ గారు పసిగట్టి తల మొట్టిన సందేశం

చిట్టి పాప ద్వారా పంపేదా నా మాట
చలి గాలి తొలిగించే వెచ్చటి చెలి బాట
తానేమో రానంది, వగలెన్నో పోయింది
కట్టిన ఆశలమంచు కరిగించి పోయింది

ఎదోటి చెయ్యాలి, గాలమేసి తీరాలి
తనతోటి కలవాలి, నా గోడు విప్పాలి
చూపెట్టు ఒ దారి, జగమేలు సూత్రధారి
కట్టు, బొట్టు, గుట్టు, ఆమె బెట్టు విడగొట్టు!